Akhir-akhir ini Reza lagi dilanda kasmaran kalau kata orang seni mah. Biasanya, ke kampus pake kaus sama jeans belel udah paling top kata cewek satu ini. Eits, kalian pasti mikir tadi Reza ini cowok ya? Nama udah laki, kelakuan juga macem laki lagi nih cewek satu. Beda banget dah sama kakaknya yang centil.

Tapi nih, akhir-akhir ini si Reza lagi macem cewek beneran. Segala pake rok yang omong-omong boleh ngambil dari lemari kakaknya. Dia sih masih aman, selagi masih belom ketauan. Kagak kayak perkara si Daniyal kemarin, mainnya kagak cantik sih tuh bocah atu, makanya ketauan sama Mpok Bella soal gincu yang dia pake bakal ngelukis. Padahal Reza cuma kasih saran, kan kudunya dia tetep main cantik.

Dua puluh tahun ngejomblo rasa-rasanya sepi banget, biar kata punya sodara yang bisa nyaingin gen gluduk, kan rasa sepinya beda gitu kata dia mah. Eh, emang dasar nasib, pulang dari kampus lihat Babe sendiri lagi pacaran sama janda, emosi Reza makin jadi aja.

“Be, buset dah. Pacaran mulu di depan anaknya. Ini anaknya aja beloman laku ampe sekarang, lah Babe udah ada gandengan lagi. Ini kita punya nasib ngapa gini amat ya, ya nasib.”

Yah, Babe Jali ketangkep basah sama anak gadisnya—yang kagak tau dah beneran gadis apa bukan—yang ngakunya kagak setuju kalau babenya nikah lagi. Ya namanya laki ya, biar kata baju dicuciin, makan dimasakin, mandi ya kagak dimandiin lah. Buset dah, dikata masih bayi apa. Tetep kan si Otong juga masih kudu dikasih makan?

“Eh lu udah pulang, Ja? Makan sono lu, Mpok lu udah masak jengkol balado noh.”

“Et dah, Be. Kebanyakan anak apa gimana si? Eja kan kagak suka jengkol, pete dah iya Eja embat.”

“Ah lu, Nong! Milih-milih ama makanan. Kudunya tuh apa aja lu syukurin, masih mending pan lu bisa makan, lu liat dah sono orang-orang yang makan aja susah. Apalagi makan jengkol yang harganya macem beli daging sapi.” 

Cing Badriah sih udah mesem-mesem lihat Babe Jali tegas begitu ke anaknya. Ya iyalah, siapa kagak kesengsem sama laki yang bisa ngatur anaknya? Mana anak bejibun lagi. 

“Ah elah, pokoknya Eja kagak setuju Babe kawin lagi! Titik kagak pake koma, jebret!” Reza natap matanya Cing Badriah tajem banget, setajam silet. Udah ke mana tuh ya infotainment? Kagak lagi kedengeran. Apa emang dasar Reza yang kagak pernah nonton tivi?

Sebelum pergi, Reza sempet-sempetnya  ngehentakin kaki. Emang songong dia mah. Wah, Babe Jali mah udah pengen nyelupin pala anak keenamnya itu ke minyak panas aja itu. Malu lah iya.

Babe ngelirik Cing Badriah ragu-ragu. Aduh, masih aja kaku nih orang tua, padahal kan udah pengalaman ama bini lama. “Neng, Abang pulang dulu ya. Itu anak kudu dibilangin dulu.”

Cing Badriah juga ikut-ikutan aja lagi malu-malu kambing. “Iye, Bang kagak ape-ape. Ya namanya juga anak, Bang. Wajar aje kayak gitu. Anak Neng aja juga ada yang masih beloman setuju, Bang.”

Lah ini mah namanya berjuang dua kali. Buat dapetin bini lama kudu ngadepin orang tuanya, eh ini pengen dapet bini baru kudu ngadepin anak-anaknya. “Ya udah, Neng. Abang pulang dulu ya. Maap Abang kagak anterin Neng pulang.”

“Iye, Bang.”

Babe Jali akhirnya jalan ngejar si Reza yang taunya udah di rumah, gedor-gedor kamar mpoknya, Bella.

“Eja!” teriak Babe Jali.

“Be, namanya masuk rumah salam dulu,” timpal Reza.

“Oh iya bentar.” Babe Jali muter badannya terus jalan keluar dari pintu. Kagak lama suaranya kedengeran, “Assalamu’alaikum.”

“Wa’ alaikumsalam.”

Kagak nunggu barang sedetik, Babe Jali udah ngagetin si Reza lagi aja. “Eja!”

“Et orangnya di depan Babe kayak gini segala diteriakin, heran.”

“Lu mah ya. Gua mah bingung ama lu, Ja. Ngapa sih lu kagak suka ama Badriah? Pan dia mah orangnya baek, penyayang gitu ama orang.”

“Ya Eja masih sayang ama Nyak, masa kudu sayang ama Nyak baru lagi. Ogah. Lagian Eja juga masih jomlo, eh Babe udah lagi mau punya bini lagi dah.”

“Lailahaillallah. Nih anak atu. Lu mau gua cariin laki? Mau kagak noh ama si Mamat anak juragan jengkol. Dia mah jadi anak laki kalem bener, kebalikannya dari lo.”

“Ogah. Eja udah ada dedemenan.”

Pintu kamar yang dari tadi ditunggu sama Eja biar kebuka, akhirnya kebuka juga. Mpoknya, Bella keluar kamar udah rapi, seger, mana wangi. Siang-siang orang lagi kepanasan, dia malah seger.

“Apaan sih? Berisik banget,” katanya sambil ngeliatin kukunya yang udah macem pasar malem, rame betul.

“Noh, ajarin adek lu biar jadi cewek. Katanya ada yang disuka. Babe ampe kagak boleh nikah lagi ama dia.”

Bella nengok ke arah Reza. Matanya menyipit ceritanya lagi mindai si Reza. “Oh emang lo cewek?”

Reza melotot. “Buset dah, Mpok!”

“Eh bentar, itu bukannya rok gue ya?”

Reza nyengir. “Iya minjem.”

“Minjem mah ngomong, Markonah!” Bella berdecak. “Udah udah sini, gue make over dah, ntar gebetan lo langsung kesengsem.”

Bella narik tangannya Reza buat masuk ke kamarnya. Alat tempurnya udah di depan mata. Tinggal eksekusinya.

“Nah, begini kan jadi keliatan ceweknya,” ucap Bella saat terakhir kali memberikan sentuhan pada bibir Reza.

Reza berniat buat muter badannya ngeliat ke kaca, eh tapi ditahan Bella. Perasaan Reza udah nggak enak aja ini mah. “Jangan ngaca, ntar malah pengen lo apus, terus gagal cantiknya deh.”

Ya mau gimana lagi? Pengalaman Reza kan masih nol kayak di pom bensin kalo soal beginian. 

Kayaknya sih firasat Reza disetujui. Keluar dari kamar mpoknya, udah disambut umpatan kaget dari adeknya si Daniyal. “Buset dah, ondel-ondel dari mana ini?”

Reza kagak pake basa-basi langsung jitak pala si Dani. Enak aja dibilang ondel-ondel. Udah muka dimasukkin bengkel mpoknya masa dikata ondel-ondel.

“Lo ngomong macem kayak gitu lagi, uang jajan lo gue potong!”

“Lah emangnya lo yang ngasih duit jajan?”

"Ya Babe lah."

“Lo ngapain sih, Mpok dandan begini? Lo yang dandan, gue yang malu.”

“Wah, berarti lo udah jelek-jelekin hasil karya Mpok Bella, Dan!”

“Astaghfirullah. Ya Allah, demit dari mana ini?!” Reza menoleh ke sumber suara. Babenya lagi megang dada, macem orang punya jantung. Lah ya namanya orang mah punya jantung, Za!

“Ih Babe, ini kan yang dandanin Mpok Bella.”

“Lu kagak ngaca apa?”

Baru Reza mau jawab pertanyaan Babe Jali sesuai sama yang diomongin mpoknya tadi, eh ada suara lagi yang ngagetin dia. “Allahuakbar!” Nira langsung narik tangan Juned buat nutupin mata anaknya. “Pada liat penampakan kagak?”

Si Daniyal udah ketawa aja dari tadi. Kalo begini caranya kan, Reza jadi penasaran sama hasil karya mpoknya. Dia langsung lari ke kaca yang paling deket. “Allahuakbar!” Jari Reza spontan nutup matanya.

Biasa, otaknya mikir keras dulu, baru paham kalo dia baru aja dikerjain sama mpoknya. “Mpok Bella!!!!!!!” Kagak mikir panjang kali lebar sama dengan luas, Reza langsung nyari mpoknya di kamarnya, eh udah kagak ada. Wah bener-bener tuh mpoknya atu.