Dekhte hi dekhte ek ghanta beet gaya, class khatam hone ko aai lekin Vineet ki najar Ruhana se jhilli nahi na hi Sikha ki Vineet se aur Karan ki unn teeno se, aab free ka manoranjan kisse gawara nahi. 

Ghanti baji, shikshak ne class khatam ki aur bahar chal diye. 

Ruhana apni kitab rakhne ke liye ouche mudi yoh paya Vineet aab tak usse dekh raha hai unka dil toh kiya haath mei li kitab de maare uske muh pe lekin khudko sambhal liya unhone. College mei kafi izzat hai unki jo wo gawana nahi chahti kissi roadside romeo ke liye. 

Ruhana ne apna muh pher liya, ye baat aab Vineet ko thik na lagi. Kitne der se bechara usse nihar raha hai kam se kam iss baat ka lihaaj kar Ruhana muskura sakti hai kyunki jahir hai it be logon mei kiss toh wo de na sakti usse, itni samajh toh usse bhi hai.

Vineet ne halke se Ruhana ke baalon ko khicha taki wo uski taraf dekhe. Pehle toh Ruhana mudi nahi lekin jab baar baar Vineet apni harkat dohrata gaya toh tivrata se Ruhana uski aur mudi.

''Kya besharmi hai ye, tumhe samajh nahi aata main tumse baat nahi karna chahti!'' Gusse bhari nigahon se Vineet ko ghurte hue, dheemi awaj mei Ruhana boli. 

''Haaye, kitni mithi awaj hai tumhari!'' Muskurataa hua Vineet bola, Ruhana ke baalon mei apna haath pherne ki koshish karte hue lekin Ruhana ne uska haath jhatak diya.

''Bol rahi hoon, sudhar jao nahi toh anjam aacha nahi hoga. Aur tumhe Sharm nahi aati kya, kal tak meri dost ke saath chipak rahe the aur aaj mere piche pade ho.'' Shikha ki aur ek najar dalte hue Ruhana boli. 

Vineet ne ek tak Shikha ko dekha,''arey ye toh bas aise hi time pass ke liye ghoom raha tha iske saath main. Tum toh patt na rahi thi toh tab tak isko hi pata liya entertainment ke liye!'' Vineet ki ye baat sun Shikha aur Ruhana dang reh gayi.

Shikha ka muh apna sa hi reh gaya. Usse itna apmanjanak kabhi na laga tha jitna aaj laga hai. Usne Vineet ke liye lya nahi kiya, uske assignments kiye apne paison se usse kapde kharid ke diya aur itna hi nahi uske dost karan ki bhi kai baar madad ki lekin aaj ussi ne usse time pass bol diya. Waise toh wo janti thi ki Vineet uske saath bhi tikega nahi, aakhir aaj tak wo kiske saatg tika hai jo uske saath reh lega lekin usne ye na socha tha ki Vineet usse time pass bol dega.

Ruhana toh aur bhi jyada achraj mei hai Vineet ki baat sun ke. Kal tak jo uski saheli sang chipak raha tha aaj usse hi time pass bol raha hai. Aab toh koi shaq hi nahi ki ye banda nihaiti nirlaj hai. 

''Dekho...'' Ruhana ne bolna suru hi kiya tha ki Vineet ne usse bich mei tok diya.

''Dekh hi toh raha hoon tabse, aur kya dekhna hai batao wo bhi dekh lenge.'' Kritrim (smirk) muskuraahat dete hue Vineet bola. 

Ye kuch jyada hi ho gaya lekin Ruhana ne fir bhi khudka saiyam banaye rakha.

''Mujhe iss tarah se pareshan maat karo. Main yahan padhne aati hoon, tumhari tarah awara gardi karne nahi.'' Gusse bhari nigahon se Vineet ko ghurte hue Ruhana boli. 

''Arey, toh main kaunsa gilli danda khelne aata hoon yahan. Jaise mere sasur ji tumhari fees bharte hai ussi tarah tumhare sasur ji bhi meri fees bharte hai. Aana toh humko bhi yahin hai na fir!'' Apni baat rakhte hue Vineet bola. 

Aab Ruhana ke saiyam ka baan tut gaya, jhat se apni kitab se Vineet ke kandhe pe de mara.

''Apni bakwas band karo samjhe. Padhne aaye ho toh chup chap padhai karo aur mujhe bhi karne do.'' Ruhana chillai aur duji taraf mud gayi. 

Vineet ko maar padi toh karan ki hanshi chut gayi lekin usne apni hanshi muh mei hi dabai rakhi kyunki usse pata hai wo Vineet se peet jaayega. 

..

Kuch hi der mei dusre shikshak aa gaye aur padhanaa suru kar diya. Kareeb ek ghante tak wo class chali fir ghanti bajne pe adhyapak chale gaye aur baki bache pe class se nikalne lage kyunki aab class khatam ho gaye. 

Ruhana bahar ki aur chal padi aur uske piche Vineet aur Karan. Par Ruhana ne unpe dhyan nahi diya, wo apni scooty pe baith nikal gayi. Kunal bhi Vineet - Karan se chupta hua nikalne ki koshish mei tha lekin Vineet ne usse apni aur bulaya.

''Aye langur idhar aa!'' Vineet ne ishara dete hue Kunal ko bulaya. 

Darte darte Kunal uske pass pahucha, Vineet ne usse collar pakad apne pass khicha.

''Naam bata!'' Vineet ne pucha.

''Kunal!'' Sehemte hue kunal ne jawab diya. 

Issi baat pe karan ne ek chanta khich ke mara, ''abey hai phatele, tera naam nahi bhabhi ka puch rahe hai bhai!'' Karan bola. 

Kunal dang reh gaya aur dono ko dekhta hi reh gaya. Ek toh dono Ruhana je piche pade hai lekin uska naam nahi jaante, waah, kya baat hai!

Kunal ko sochta hua dekh Karan ne fir ek chanta lagaya. 

''Ruhana.. Ruhana naam hai uska.'' Khat se kunal bola kyunki aab wo aur maar nahi kha sakta. 

Ruhana ka naam sun Vineet ke dil mei titliyaan udne lagi.

''Vineet sang Ruhana!! Kitna acha lagta hai sunne mei.'' Khilkhilata hua Vineet bola par fir uski najar Kunal pe padi jisse abbi bhi sabak sikhana hai usse.

''Sun bey langur, jyada angur khane ki lalach mei maat reh. Agar ijjat aur apni ye sakal pyari hai toh ek - do baat apne deemag mei fit kar le. Pehli baat, sasur ji ka wafadar banne ki jyada jarurat nahi hai kutta nahi hai tu insan hai wahi reh. Aur duji baat, unhone tujhe rakha hai lekin kaam tu hamara aab karega. Aur aab sab se jaruri baat, bhabhi hai wo teri ijjat se pash aana jyada mauke ki talash mei raha na toh tu kahin nahi rahega fir.'' Bade hi mithe swar mei Vineet ne Kunal ko dhamkaaya. 

Aab karan ne usse apni aur khicha,''yaad rahe jyada hoshiyaari bhadi par jaayegi tujhe. Aadhar card, rashan card aur jitne bhi card hote hai sab se tera naam katwa denge aur tere hi hospital se tera death certificate nikalwa denge hum!'' Kunal ke baalon ko nochta hua karan ne usse samjhaya aur fir usse dhakka maar bhaga diya. 

Kunal bhi fatafat apna bike liye bhag khada hua, uski aaj ke maar ka kota pura ho chuka hai. Uska sareer aur maar bardasth na mar paayega. 

Iss tarafa Kunal ghata aur dusri taraf Vineet aur Karan bhi apni ghar ki aur nikal pade. 

..

Birju apni dukan pe aab tak jaise taise thethra raha. Uske ghai mei dard ho raha hai usse lekin usse pata hai Kishori ji uski na sunenge akhir galti uski jo hai upar se uski wajah se unko itni dant padi hai, abhi toh kuch ho jaaye wo Birju pe daya na karenge issliye bolna bekar hai. 

Apne dard ko chupaaye Birju Dukan pe baitha baitha soch raha tha ki jaane Vineet ne uss ladki se aab tak baat ki bhi hai ya nahi ki tabhi Vineet aur Karan wahan aa dhamke. 

Karan ne jhat se ek Lays ka packet phad liya, Birju ne khich ke ek tamaacha lagaya.

''Bandar ki chal sudharti nahi tumhari. Babu ji gin ke gaye hai sab aur aa ke paise jodenge, tumhari chatori jaban ne ye chips kha toh liye lekin iska paisa tumhari jeb se niklenge?'' Gusse se Birju ne pucha. 

''Arey kyun ukhaad raha hai, ek chips hi toh hai de denge paise.'' Vineet ne jawab diya aur ek 5star phad diya. 

Birju ko waise toh dono pe pura bharosha hai ki dono paise na denge lekin wo kar bhi kya sakta hai, aab toh dono ne kha liye jo khana tha. 

Par khane ke badh Vineet ne jab Birju ke haath mei kuch pakdaya toh Birju phula na samaya.

….

To be continued..