Rihana bhagti rahi, jab tak wo apne ghar na pahunchi wo ruki nahi aur na hi Vineet. Jab Ruhana apne ghar mei ghush gayi tab jaa ke wo ruka, kuch der wahin khada raha jaane kyun pair na hil rahe the uske wahan se jaane ko par ye bhi janta hai wo ki wahan rukna bhi uske liye thik nahi. Mishra ji agar kahin se aa gaye toh uski khair na rahegi.

Yahi soch ke wo apne ghar ki aur mudd chala, mann mei kai sawal liye hue, kai kashmakash mei dube hue.

Chalo wo toh hai hi dil phek par Ashish? Usne kaise itna ghatiya kaam kiya, jab ki wo toh ek doctor hai aur shayad ache se janta hai Mishra parivar ko. Fir itni nichi harkat kaise ki usne?

Vineet ko jaane bilkul acha nahi laag raha tha. Bhale hi wo bhi ladkiyon sang chipakta hai, unn ke piche bhage par bina unki izazat ke kabhi kissi ko haath na lagaya hai. Haan, izazat milne pe khul ke izhar kiya hai par unki marzi ke khilaf kuch na kiya. Jab wo aisa nahi karta fir Ashish ne kaise kar diya?

Vineet ka demag puri tarah hil chuka tha, usse kuch samajh nahi aa raha tha ki akhir kare toh kya kare. Itne nei hi Shikha ka phone aa gaya aur wo uss se milne chala gaya, akhir naya naya patch up hua hai naraz na karega usse par dusri taraf Ruhana ki chinta bhi usse sata rahi thi, uska rota chehra Vineet se bhulaye bahi bhula jaa raha tha.

...

Idhar Ruhana bhagti apne ghar mei ghusi, aankho se ansu band hone ka naam hi nahi le rahe the. Shakuntala ne jab apni beti ko aise haal mei dekha toh sehem gayi. Turant Mishra ji ko phone laga ghar bula liya aur Ruhana ke kamre ki taraf bhagi.

Ruhana apne bistar ke ek kone mei baith sisak sisak ke ro rahi thi, unhe kuch samajh nahi aa raha tha ki akhir unke saath aisa kyun hua?? Unhone toh kabhi kissi ka bura na socha fir unke saath bura kyun hua? Ashish acha ladka nahi hai ye toh wo janti thi oar wo itna niche gir jaayega aisa toh kabhi na socha tha Ruhana ne. Jitna wo uss sab ko yaad kar rahi thi utna hi darr unke andar ghusha chala jaa raha tha aur wo simti chali jaa rahi thi.

Itne mei Shakuntala unke kamre mei pahuchi toh apni beti ko rota dekh saham gayi. Aaj tak kabhi jis beti ke aankhon mei unhone ansu nahi ane diye the wo sisak sisak ke ro rahi hai. Shakuntala ka toh dil baith hi gaya wo dekh ke. Wo Ruhana ke pass bhagi aur usse gale se laga liya jis se wo aur zor se rone lagi, Shakuntala ne kai martafa rone ka karan pucha par Ruhana bata naa paai aur akhir rote rote behosh ho gayi. Jis se Shakuntala ki darr se halat bigad gayi, wo toh sukra hai ussi waqt Mishra ji aa gaye, par Ruhana ko dekh wo bhi ghabra gaye aur unhe toh jara sa bhi waqt na laga ye janne mei ki akhir unki beti ro kyun rahi hai.

Shakuntala ki madad se unhone Ruhana ko letaya aur fir ek mahila doctor ko phone kar ghar pe bulaya, saath hi police ko bhi bula liya unhone.

Ek taraf beti ko aise bistar pe behosh pada dekh Mishra ji andar hi andar toot rahe the aur dusri aur gusse mei pura badan garam hue jaa raha tha unka. Kissi keemat pe wo usse nahi chodenge jisne unki beti ko haath lagane ki koshish ki hai. Waise toh wo hinsha ke khilaf hai par abhi agar wo ladka samne aa jaaye toh Mishra ji usse peetne se pehle thoda bhi hichkenge nahi.

Kuch waqt beet chala, mahila doctor ka aagman hua aur unhone Ruhana ka check up kiya fir Shakuntala ki madad se unke kapde change karwa diye. Tabhi Shakuntala ko ehsas hua ki jo jacket Ruhana odh ke aai hai wo toh uska hai hi nahi. Fir wo hai kiska? Kahin uss insaan ka toh nahi jisne uske saath jabardasti karne ki koshish ki hai?

Shakuntala ne Mishra ji ko andar bulaya aur wo jacket dikhai par pehle Mishra ji ne doctor se janch partal ki.

''Ghabraiye nahi Mishra ji, sab thik hai!!" Doctor ne aswasan diya toh Mishra ji ke jaan mei jaan aai. Aisa nahi hai ki agar kuch galat hua hota toh Mishra ji apni beti se muh mod lete ya badnaami ke darr se chup reh jaate, nahi aisa wo bilkul nahi karte. Bas unhe apni beti ki chinta hai jo shayad toot jaati aur iss dard se na ubhar paati. Par aab jo aisa hai nahi, unhe ye chinta bhi nahi hai.

Aab unhone uss jacket pe nazar daali aur socha uski janch kare par aab unhone police ko bhi bulaya hua hai toh unhone laga yahi behtar hoga agar police hi janch partal kare jacket ki aur talashi le.

Mishra ji ne fir se police ko phone lagaya ki ussi waqt afsar andar aa ghush ghar ke aur unhe pukarne lage. Mishra ji jacket le niche chale gaye aur police ko dete hue saari baat bata di aur ye bhi bataya ki Ruhana Ashish ke saath gayi thi par jacket Ashish ki nahi hai.

Afsar ne jacket ki talashi li toh unhe ek purse mila aur usmei mila uske malik ka aadhar card jo ki tha Vineet ka. Mishra ji toh aag babula ho uthe.

''Ye badmash!! Yahi kitne din se meri beti ke picha pada tha aur aaj itni nichi harkat pe utar aaya.'' Gusse mei gurrate hue Mishra ji ne police ko bataya.

Afsar ne Mishra ji ashwasan diya ki aaj wo iss ladke ko pakad hi lenge aur usko wo haal karenge ki fir wo kissi ladki ke taraf dekhega bhi nahi.

Waise toh police usse aise bhi pakadti hi par aab toh usne aur galat kadam utha liya hai jis se uske khilaf kade se kade kadam uthaye jaayenge.

Kuch waqt badh police aur doctor dono hi chale gaye. Unke jaate hi Shakuntala phoot ke ro padi, Mishra ji ke khud ke aankho mei bhi anse the par wo ro na paaye akhir rote toh baki ko kaise sambhal paate. Iss waqt toh unhe sab se jyada sahas dikhana hai aur uss ladke ko saza dilwana hai unne, kissi keemat pe!!!

...

To be continued...