Kabanata 12

Date Him

Tuluyan akong pumasok sa opisina. Nakita ko kaagad sa sofa na naka number 4 na upo si Logan, pinapanood ako. Sa gilid niya ay si Kid na pagkakita sa akin ay agad lumapit.

Uminit ang pisngi ko. Ngayong naka uniporme ako ng pang janitress at nagtutulak ng cart na kulay yellow ay mas lalong naisigaw ang agwat ko sa kanilang lahat. Si Kid ay naka kulay sky blue na polo shirt, si Logan ay naka kulay grey na v-neck, at si Rage ay naka longsleeve na nakatupi hanggang siko.

"Thanks, Tam. You may go." Ani Rage sa babaeng kausap.

"Hi Sunny!" Panimula ni Kid habang nilalapitan ang cart ko.

Hindi ako makatingin sa kanya. Nag simula na lang akong mag walis sa sahig. "Hello po!"

"You busy?" Tanong ni Kid.

"Obviously, Kid." Iritadong sinabi ni Rage galing sa kanyang table.

Hindi ako nag angat ng tingin. Pinagpatuloy ko na lang ang ginagawa ko. Ito ang nag papaalala sa akin kung saan talaga ako nababagay. Sampal ng katotohanan. Kung bakit ako nangangarap nitong mga nakaraang araw na sana ay iba na lang ang aking buhay ay hindi ko na alam iyon.

"Sungit mo, Rage. I'm entertaining her para naman maging masaya siya sa kanyang trabaho." Ani Kid habang lumalapit sa akin, sinusundan ang pag wawalis ko.

"You're disturbing her, Kid." Ani Rage.

"Ang mabuti pa, tulungan mo siya, Kid. You want to impress the girl, help her." Ani Logan sa may sofa.

"I know what to do, Logan. Wa'g mo akong turuan." Masungit na sinabi ni Kid habang kinukuha ang iisa pang walis galing sa cart.

Mas lalong uminit ang pisngi ko. Ayaw ko ng ganito. Nahihiya ako. Para akong sinasampal ng paulit ulit! "Wa'g na, Kid. Kaya kong mag isa."

"No, I'll help you Sunny. Mas mabuti mas mabilis matapos ang trabaho." Ani Kid sabay walis.

"Stop that, Kid." Mariing sambit ni Rage galing sa upuan.

Nagkibit balikat si Kid kay Rage. "What's your prob? I'm helping out! Hindi ako nanghihingi ng sahod sayo." Hagikhik niya.

"This is not funny. Leave the girl alone." Ani Rage sa tonong mas mariin.

"Okay lang naman kay Sunny na nandito ako. Hindi ba, Sunny?" Bumaling si Kid sa akin.

Humugot ako ng malalim na hininga. "Oo. Pero, wa'g ka ng magwalis. Trabaho ko 'to. Nakakahiya sa'yo." Sabi ko.

"I want to help you, Sunny. Para mas mabilis kang matapos."

"Let her, Sun. I'm sure pagbibigyan ni Rage si Kid?" Natatawang sinabi ni Logan habang nakatitig siya kay Rage.

Bumaling ako kay Rage at pinanood ko ang matalim niyang titig kay Logan. Alam kong ayaw niyang tumulong sa akin ang kanyang kaibigan. Alam kong ayaw niyang pagtrabahuin si Kid pero mapilit siya. Hindi ko na sinagad ang trabaho dahil nahihiya akong pag may iba pa akong lilinisan ay tutulong ulit siya.

Pinanood ko kung paano namuo ang pawis sa noo ni Kid habang nag wawalis. Hindi ko mapigilang mapangiti.

"Dito ba ilalagay ang basura?" Tanong niya habang dinadala ang dustpan sabay turo sa basurahan ng cart.

Tumango ako at ngumiti.

"Ba't ka ngumingisi? May dumi ba ako sa mukha?" Nag taas ng kilay si Kid at hinaplos niya ang kanyang mukha.

Mas lalo lang akong napangisi. Umiling na lang ako bilang sagot.

"Kung ganon, anong nginingisi ngisi mo dyan? Is there something wrong, Sun?" Humakbang siya palapit sa akin.

Nanlaki ang mga mata ko. Hindi ako naging handa sa kanyang paglapit. Nahihiya ako sa kanyang pagtulong at mas lalo akong nahihiya ngayong nagiging friendly siya sa akin. Alam ko noong party pa lang na mahilig siyang dumikit sa akin. Pero inakala kong dahil lang iyon sa alak. Ngayon ay nararamdaman kong talagang pursigido siyang magpapansin at hindi ko mapigilang mapangiti. Batid ko ang agwat naming dalawa pero ang makitang may naghihirap para lang mapansin ka ay nakakataba ng puso.

"Wala po." Natatawa kong sinabi at napaatras nang masyado na siyang malapit.

Tinagilid niya ang kanyang ulo para suriin ang mukha ko. Uminit ang pisngi ko.

Narinig ko kaagad ang kalabog sa table ni Rage. Sabay kaming napatingin sa kanya. Padarag siyang umupo sa swivel chair habang hinuhubad ang kanyang long sleeve. Naka puting v neck t-shirt at nagpakita ang kanyang dogtag. My favorite shirt.

"What's wrong, Rage?" Nilapag ni Logan ang kanyang iniinom na juice sa table.

"Just about the numbers." Aniya sabay turo sa mga papel sa harapan.

Bumaling ulit si Kid sa akin na parang hindi kami naistorbo. Hindi ko maalis ang titig ko sa mukha ni Rage. Nakapangalumbaba siya at ang kanyang daliri ay naglalaro sa kanyang labi.

"May gagawin ka mamayang gabi?" Tanong ni Kid sa akin kaya napabaling ako sa kanya.

"Uhm, Thursday kaya wala." Sagot ko.

Tumango si Kid at ngumisi sa akin. "Pwedeng makuha ang number mo?"

Ngumuso ako at yumuko. Napaalala niya sa akin na wala nga pala akong cellphone. Isang bagay na dapat ay mayroon ako. Uunahin ko na lang muna ang matutuluyan ko. Tutal ay next next week, aalis na ako sa Del Fierro.

"Wala akong cellphone." Amin ko.

"What?" Napatingin siya kay Logan. "Wala siyang cellphone!" Aniya nang di makapaniwala.

"Dapat may cellphone ka, Sunny." Ani Logan.

"Bibili din ako." Nahihiya kong sinabi.

"Oh, well, hindi ko kailangan ng cellphone para ma invite ka for dinner mamayang gabi?"

"What the hell, Kid?" Singit ni Rage.

"What, dude? Si Sunny ang niyayaya ko. Hindi ikaw. Get a life." Ngiwi ni Kid at bumaling ulit sa akin.

"You're not allowed to date my employees." Ani Rage.

"You're employees are not your property, Rage. I'm allowed." Tumawa si Kid na para bang nagbibiro si Rage.

"Uh, Tama si Sir, Kid. Hindi ata pwede. Hindi magandang tingnan." Sabi ko.

"Bakit naman hindi magandang tingnan? What's wrong with a simple dinner?" Kumunot ang noo ni Kid sa akin.

"Why not sa bahay na lang ni Rage, Kid? Mas maganda ang group date. I'll bring some of my friends. Sunny can bring her friend Mia."

Lumiwanag ang mukha ni Kid sa sinabi ni Logan. "Good idea!" Bumaling siya sa akin. "Pero, dapat next time, dinner sa labas."

Narinig ko ang mga mabibigat na buntong hininga ni Rage sa gilid. Gusto kong tumanggi dahil nahihiya ako pero may parte sa aking gustong makita pa lalo si Rage mamayang gabi. Hindi ko gaanong na appreciate ang bahay niya nong una akong nagpunta dahil sa party at ngayong walang party ay siguro, mas makikita ko ito ng maayos.

"What do you think, Sunny?" Nagtaas ng kilay si Kid sa akin.

Dahan dahan akong tumango.

Gumuhit ang gulat sa mukha ni Kid na para bang di makapaniwalang pumayag ako. "Really?"

Tumango ulit ako kaya mas lalo siyang ngumisi.

"Sunny..." Ani Rage pero natabunan na ang boses niya sa isang malaking "YES!" galing kay Kid.

Tumatawa na lang si Logan sa naging reaksyon ni Kid. Hindi ko rin mapigilan ang pag ngiti. Tinulak ko na lang ang cart palabas ng opisina. Sinulyapan ko ang mukha ni Rage habang nakaupo siya sa swivel chair at nakapangalumbabang tinitingnan ang masayang masayang si Kid.

Napatingin ako kay Kid na ngayon ay mapupungay ang mga matang tinitingnan ako. Ngumiti ako at kumaway siya. Tinapunan siya ng unan ni Logan at nagtawanan ulit ang dalawa.

Hindi ko napawi ang ngiti ko habang pababa ng 15th floor. Hindi ako mapakali at hindi ko alam kung bakit. Naaalala ko ang galit na mukha ni Rage ay mas lalo akong napapangisi. Kinagat ko ang labi ko. Kung ano man iyong iniiwasan kong bitag ay pakiramdam ko tuluyan ko ng naapakan.

Tumunog ang elevator sa kabila, halos kasabay ng paglabas ko. Tinulak ko ang cart habang iniisip pa rin ang lahat ng nangyari kanina.

Walang tao sa corridor. Siguro ay naglilinis ang lahat sa kani kanilang floor. Itutulak ko na sana ang pintuan papasok sa Lounge nang biglang hinila ang kamay ko at ibinaon sa dingding. Napapikit ako sa gulat. Nang dumilat ako ay nalaglag ang panga ko nang nakita ko si Rage na hinahabol ang hininga.

"You can't date my friend, Sunny." Mariin niyang sinabi.

Tinikom ko ang bibig ko at agad kong binawi ang kamay kong ibinaon niya sa dingding. "Bakit?"

Nagulat siya sa tanong ko. Kung akala niyang papayag na lang ako sa gusto niya dahil boss ko siya ay nagkakamali siya. Kailangan ko ng paliwanag. Kailangan ko ng rason. Lumunok siya. "You're my employee."

Umiling ako. "Oo. Hindi pwede 'yong mayaman at mahirap sa'yo, diba? Friendly date lang naman 'yon." Medyo iritado kong sinabi.

"Wala akong pake kung mayaman o mahirap ang mga tao. Ang gusto ko ay walang date na mangyayari."

Nanlaki ang mga mata ko sa sinabi niya. "Bakit nga?" Hamon ko sa kanya.

Hindi siya agad nagsalita. Dumistansya siya sa akin. Napatingin ako sa dibdib niyang may kumikinang na dogtag.

"Sabi mo magkaibigan tayo, Rage." Dahan dahan kong sinabi habang nakataas ang kilay. "Ang magkakaibigan, sinusuportahan ang isa't-isa. Kung gusto kong pagbigyan si Kid, suportahan mo ako."

Pabalik balik na bumukas ang kanyang bibig na para bang may sasabihin siya pero pinipigilan niya ang sarili niya. Pinanood ko siyang ginulo ang kanyang bagong gupit na buhok habang nag iiwas ng tingin.

"Bakit ayaw mo'ng i-date ko siya?" Tanong ko ulit.

Kumalabog ang puso ko. Alam ko. Alam ko, Sunny. Kung ano man iyong iniiwasan ko noon ay ipinagkakanulo ko na ang sarili ko ngayon. Ano ngayon kung magkagusto nga ako sa isang tulad niya? Ano ngayon kung lokohin niya ako? Ano ngayon kung gago siya?

Yumuko siya at lumebel sa akin ang kanyang labi. Binasa ko ang labi ko at mas lalong kumalampag ang puso ko. Pulang pula ang kanyang labi at inisip ko kung anong pakiramdam pag nahalikan ko siya. Anong pakiramdam pag naglapat ang labi namin. Tumagilid ang ulo niya at para akong nalasing sa ginawa niya. Nawawala ang paningin ko. Nilapit niya pa ang mukha niya sa akin. Ilang pulgada na lang ay mahahalikan ko na siya nang biglang tumunog ang cellphone.

"OH MY GOD!" Sigaw ni Mia ang umalingawngaw sa buong lugar.

Napatingin kami ni Rage pareho sa kanya. Mas lalo akong kinabahan. Inisip ko kung ano ang iisipin ni Mia. Inisip ko ang iisipin niya kay Rage.

Hindi man lang lumayo si Rage sa akin. Nang bumaling siya ay ganon parin kalapit ang mukha niya sa akin. Matalim na ang kanyang mga mata. Sa labi niya ako nakatingin nang binanggit niya ito...

"Date him, then." Hamon niya.

"Okay." Sagot ko sa kanya.

Umigting ang panga niya bago niya itinulak ang dingding para makaalis sa kinatatayuan niya. Halos mapaluhod ako sa kinatatayuan ko. Dinaluhan agad ako ni Mia gamit ang kanyang gulat at nakikiusyusong mga mata.

"ANONG KABABALAGHAN IYON?" Sigaw niya sa akin.

Marami ang nag laro sa utak ko. Nag agawan ang nangyari kanina at ang issue tungkol kay Eric na kanina ko lang din nakita.

Hinawakan ko ang braso niya bilang suporta at walang imik kong hinila ang cart papasok ng Lounge habang pinapaulanan niya ako ng mga tanong tungkol kay Rage.

"Oh my God, Sunny? Nag kiss kayo?!" Sigaw niya sa loob.

Walang tao doon ngunit kailangan ko paring mag ingat. Agad ko siyang pinatahimik. Umupo ako sa sofa at siya naman ay sa sobrang gulat ay hindi magawang umupo. Humalukipkip siya sa harap ko.

"Anong nangyari?" Tanong niya.

Nag angat ako ng tingin sa kanya, hindi ako sigurado kung alin ang uunahin kong ipaliwanag. Nang sa wakas ay nag desisyon akong ipaliwanag sa kanya ang tungkol kay Rage dahil iyon naman ang itinatanong niya ay napaupo na siya sa tabi ko.

Kinwento ko sa kanya ng buo ang paniniwala ko, ang nangyari kay mama noon, at ang nangyari sa amin ni Rage. Alam niya na ang halos lahat ng nangyari tungkol sa akin ngayon. Napagtagpi tagpi niya na rin kung bakit sanay na ako sa manlolokong lalaki.

Lumaki ang ngisi niya nang natahimik kami. "Pupunta tayo mamaya?" Aniya.

Tingin ko ay hindi magandang ideya na lumipas ito nang hindi ko nasasabi ang nakita ko kanina. "Mia..."

"Pupunta tayo?" Lumaki ang ngiti niya.

Pinanood ko muna ang masiyahin niyang mukha. Nang nakita niyang seryoso parin ako ay napawi ang ngiti niya. "Mia, kanina nung pauwi ako galing school, tingin ko nakita ko si Eric."

"Saan?" Kumunot ang noo niya.

"Malapit lang dito. Sa sakayan ng jeep. May kasama siyang babae." Agad kong tinikom ang bibig ko.

Umiling si Mia na para bang sigurado siya sa kanyang sasabihin. "Baka kamukha niya lang. Imposible, nasa trabaho siya. Saturday at Sunday ang day off niya."

Gusto kong manindigan na si Eric nga iyon. Pero natatakot akong makasira ng relasyon ng walang katibayan. Tumango na lang ako kay Mia. Ngumisi ulit siya na parang walang narinig tungkol sakin.

"Mamaya?" Tanong niya.

Hindi ako makapaniwala na matatag ang tiwala ni Mia kay Eric. Hindi ako makapaniwala na hindi niya inisip man lang ang sinabi ko.

"Oo, mamaya." Sabi ko.

Pumalakpak siya sa excitement.

Kalaunan ay nalaman ko rin kung bakit kampanteng kampante siya. Nagkaayos sila ni Eric. Pinaulanan siya ng bulaklak at mga regalo. Siguradong sigurado siya na hindi magsisinungaling si Eric sa kanya.

"Alam mo kasi, Sunny, narealize ko, kailangan mo lang talagang mag tiwala. Kung mahal ka ng tao, mahal ka talaga nila." Ani Mia.

Hindi ako sumang ayon. Hindi rin ako umiling. Hinayaan ko siya. Ngunit natatakot ako sa mangyayari. Natatakot ako para sa kanya. Nakita ko na kung paano mawarak ang mga babae. At ayaw kong mangyari iyon sa kaibigan kong ito.

Makahulugan siyang tumitig sa akin at ngumisi.

"Sir Rage Del Fierro, makikita ko mamayang gabi ang gagawin mo. Humanda ka." Mas lalong lumaki ang ngisi niya na para bang may masama siyang balak.