Mishra ji apne gusse ko shant karte hue, Shakuntala se milne gaye. Wo aapna gussa aur uss ladki ki baat Ruhana aur Shakuntala ko nahi batana chahte hai kyunki wo sunke Ruhana bhi bhadak jaayegi aur Shakuntala ko tension hone lagegi aab baat hi kuch aisi thi toh kya kare. 

Ladki wali baat dono ko na batane ka thante hue, Mishra ji Shakuntala ke ward mei pahuche jahan aab Shakuntala Ruhana se baatein kar rahi thi.

Chehre pe ek badi si muskan laate hue Mishra ji Shakuntala ke pass pahuche,

''Aab kaisa laag raha hai Sakku''mithi si swar mei Mishra ji ne pucha.

Shakuntala halki si muskurate hue boli,'' thik hai hum aur aab ghar jana chahte hai''unhone apni iccha jahir ki.

''Thik hai, main discharge paper taiyar karwata hoon aur tum dono ke jaane ke liye taxi mangaa deta hoon. Tab tak tum dono baatein karo ''Mishra ji ne apni patni ki baat mei haami bharte hue kaha lekin Shakuntala ko ye baat kuch thik na lagi kyunki jis tarah se Mishra ji ne kaha uss se saaf jahir hai ki wo abhi aspataal mei hi rehne wale hai.

''Aap bhi chalte saath mei toh aacha rehta''Shakuntala boli.

Mishra ji ne gehri saans bhari, kuch reh chup rahe fir bole,''chalta toh lekin kuch marijon ko dekhna hai. Tum dono chalo main kuch der baadh aata hoon piche se'' ye kehte hue Mishra ji nikal gaye wahan se.

Jahan ek taraf Shakuntala ko discharge mil raha tha wahin dusri taraf Sharma parivar jinko aaspatal se nikal diya gaya tha aab fir sasu maa ke taano se murjhaa se rahe hai.

Aakhir sasu maa seh kaise leti itni badi beizzati bina kissi drama ke. Khadi hai aaspatal ke bahar pure zille ko apni beizzati ki dastan suna rahi hai.

Kishori ji, Shukla ji aur Sharma ji ek kone mei khade hai ye dikhane ki koshish karte hue ki jo buddhiya paagalon ki tarah chilla rahi hai unka inn teeno se koi sasta nahi, aakhir inko apni izzat pyari jo hai.

''Sharma ji, ye amma ji toh chilla chilla ke pure mohalle ko ikkatha kar lengi lagta hai. '' halke swar mei Shukla ji bole.

''Toh hum kya kare aab jab inko apni izzat aise nilam karwani hai. Itna bhi na soch rahi ye ki hum aaspatal mei hai yahan logon ka ilaz hota hai. Lekin inko kaun samjhaye, kismat hi kharab hai hamari toh ek taraf Amma ji dusri taraf wo nalayak''Gusse ka pyala swar peti mei dabate hue Sharma ji dheere se bole.

Kishori ji ne apne dono mitron ko ek chan dekha fir bole,''bhaiya kismat toh hum teeno ki hi phooti hai''ye sunke baki dono ne hami bhar di aab baat sahi jo hai. 

Abhi yahan Sasu maa ka balla chilla chal hi raha tha ki itne mei ek nurse bahar aai aur Kishori ji ki aur badhne lagi lekin Sasu maa ne usse raste mei hi rok ke itni jali kati sunai jaise ki wo nurse koi pushteni dushman ho. Nurse ko bhi gussa chadh gaya,

''Aap paagal wagal hai kya. Aapko itni akal nahi hai ki on duty nurse ko rok ke jhagda karne lagi itti der mei kissi mariz ko kuch ho gaya toh iska zimmedaar kaun hoga'' nurse jwala si sasu maa pe barsi, sasu maa ka muh utar ke ittu sa ho gaya. Hota bhi kyun na aaj ek hi din mei do baar beizzati hui hai unki aur ye dekh ke teeno mardon ko itna maza aaya ki hansi nikal padi unki. 

Itne mei nurse kishori ji ke pass aake boli,''aab aap apne bete ko le jaa sakte hai, unko taakein laga diye gaye hai'' fir wo baki do ki taraf mudate hue boli,''aur aap dono bhi apne apne beton ko le jaa sakte hai. Discharge papers ready hai'' itna kehte hue Sasu maa ko ek tak ghurti hui nurse andar chali gai.

Lekin aab mardon pe talvaar latak gai, sabhi ne nurse ki baatein sun li thi aur aab aur joron se shor hone lagge,

''Jija jii kya hua hai Vinu ko jo yahan admit hai wo aur aapne humein bataya bhi nahi''Rastogi ji ne chinta purwak pucha, aakhir chinta kyun na ho Vineet unka eklauta bhanja jo hai.

Abhi Sharma ji ne muh khola bhi nahi tha ki Karan ki maa Shukla ji pe baras padi,

''Aapki himmat kaise hui mujh se itni badi baat chupane ki Shukla ji. Mera jigar ka tukda yahan hai aur aap tabse yahan bhoot bane khade hai''Karan ki maa kuch yun chillaai ki Shukla ji ko laga kam se kam Haryana tak toh awaj gai hi hogi aur raha sawal wahan upasthit logon ka toh wo toh kareeb kareeb behre ho hi gaye.

''Arey aap log humein bolne doge tab bolenge na, khud hi bole jaa rahe ho''Kishori ji barshe, Sharma ji aur Shukla ji ne unki aur dekha fir unki patni ko dekha jo aag babula ho rakhi thi lekin chup thi dono samajh gaye Kishori ji ki class ghar pe lagegi.

Sasu maa jo aab tak chup khadi thi jhat se saamne kud padi teeno ke,''toh kholo na apna ye ganda sa muh, kaahe muhuurat ka intezar kar rahe ho''

Aab toh bolna padega ek baat spasht thi, lekin bole kya wo teeno mei se kissi ko nahi pata. Teeno ne ek duje ko dekha aur ek duje ko dekhte hi samajh gaye ki aab toh koi kahani hi gadhni padegi nahi toh Amma ji maar maar ke bhurta bana dengi teeno ka.

''Muh mei dahi jama liya hai kya teeno ne, bolo''Sasu maa chillai. Teeno kanp uthe, Sharma ji jhat se bole,

''Teeno ko kuch gundo ne peeta hai Amma ji''itna bolke Sharma ji do kadam piche ho liye.

Baki do ko saari baat khudva khud samajh aa gayi, aab bas unko bhi kahaniyaan sunani hai koi bhi.

Sharma ji ke badh Shukla ji maidan mei kude,''haan Amma ji! Aab kya bataye hum jaane kis liye teeno ko itna maara un ladkon ne ki bas. Hum teeno toh khud bhauchakke se reh gaye teeno ko maar khata dekh'' Shukla ji ne kuch aise baatein boli ki jaise sach hi ho sab.

Aab bari Kishori ji ki thi, apna morcha sambhalne kishori ji aage aaye hi the ki Amma ji ne kuch aisa kiya jis se baki sab dang reh gaye!!

.

Aage kya hoga jaane ke liye banne rahiye hamare saath 

Milte hai agle adhyay mei..